DÍA DAS BIBLIOTECAS (1)

 Este ano celebramos o Día das Bibliotecas baixo o lema “Contra a desinformación”, lembrando que a biblioteca é unha fonte segura de coñecemento e cultura.

Todas e todos temos cabida neste espazo de aprendizaxe e imaxinación. Cada lector e lectora é diferente, e iso fainos especiais.

Por iso traballamos este libro, que explica con pictogramas como funciona unha biblioteca, para que todas as persoas, con diferentes maneiras de aprender e de entender o mundo, poidan descubrir o marabilloso universo dos libros e da información fiable.

NENA E O MAR

 Benvid@s ao Club de Lectura deste curso 2025/26 no CEIP A Cristina!!

Este ano temos o privilexio de traer ao noso clube a novela "Nena e o mar", creada pola escritora coruñesa Érica Esmorís e que nos traslada á vila costeira de Porto Balea para vivir da man da Nena, a súa protagonista, grandes aventuras!

Os dous primeiros capítulos preséntannos tanto a Nena como á contorna na que vive, o pobo mariñeiro da Porto Balea, que hai tempo atrás tratábase dunha poboación activa e emprendedora grazas a súa principal actividade económica: a caza de cetáceos.

A primeira actividade que fixemos no Clube de Lectura foi un pouquiño de papiroflexia para recrear os barcos que deben estar amarrados no peirao de Porto Balea, máis nós fixémolos de cores para darlle un chisco de ledicia ao ambiente da vila e tamén para decorar o teito da nosa biblioteca. 

Cal será a próxima actividade?

Xa veremos xa!

Medo me dá!!!

 Este ano, e como vixentes campións, volvemos participar no certame de Teatro Lido que convoca o FIOT.

Mario, Lucía, Óliver, Aroa, Julia, Marta e Álvaro son os integrantes dos Cristinatreiros e xuntos interpretan "Medo me dá" de Ramón D. Veiga e con adaptacións da profe Maica.

Os monstros tamén teñen os seus medos; non todo vai ser temerlles a eles. O vampiro teme ao dentista, ao home lobo non lle gusta cortar o pelo, a momia ten medo de envellecer... 

Botádelle un ollo á gravación. Que ben o fan!

MOCHILAS VIAXEIRAS

 Unha vez máis botan a andar as mochilas viaxeiras no noso cole! Este curso a temática está relacionada co proxecto de centro "As crebas da Cristina" sobre como mellorar o patio, aproveitando o legado, o que xa temos.

Engadimos exemplares sobre medio ambiente, ecoloxía ou reciclaxe e outros libros que dan pé a actividades máis manipulativas aproveitando os envases do lixo.

Deixámosvos as nosas recomendacións para a educación infantil.

NOVAS VOLUNTARIAS!

Durante o mes de setembro hai que poñer a andar a biblioteca un curso máis. Nuno conta con novas voluntarias que, sen dúbida, farán unha gran labor. 

Martina, Nerea, Sofía, Marta e Alba xa teñen os seus carnés! Grazas pola vosa axuda, amigas!

PROXECTO DE CENTRO

 É o proxecto anual do CEIP A Cristina, centrado na sostibilidade, o coidado do medio ambiente e a creatividade a través do refugallo. O nome fai referencia ás crebas, os obxectos que o mar devolve á costa, que o alumnado recolle, transforma e converte en arte.

A idea principal é dar nova vida ao que outros desbotan, aprendendo a reutilizar, reciclar e crear con imaxinación e conciencia ecolóxica. O proxecto

 combina educación ambiental, artística e emocional, aproveitando as nosas fortalezas, como centro e promovendo  o respecto pola natureza, o consumo responsable o traballo en equipo e o compromiso co planeta.

RECOMENDACIONS LECTORAS

 

TEATRO DE SOMBRAS

 Fai uns días anunciábamos o final do obradoiro de teatro de sombras e aquí tedes o resultado do primeiro pase:

Pincha en cada título para ver o vídeo:

OS TRES PORQUIÑOS

A BOLBORETA MÁIS BONITIÑA

TEATRO DE SOMBRAS

 No marco de BIBLIOTECA CREATIVA, a noso obradoiro de TEATRO DE SOMBRAS, chega ao seu remate.

Despois de moitas xornadas de cociña, elaborando os guións, as siluetas , a iluminación, as entradas, e os ensaios, chega o momento da representación, amosando con moita fachenda o resultado.

Poderedes visualizar o noso traballo na biblioteca do centro, ao que se acudirá por niveis. E mentres seguimos coa última fervedura, aquí vos deixamos  un entrante. A que semella interesante?

CLUB DE LECTURA

Despois duns  meses de grandes debates no club de lectura o pasado martes tivemos un encontro final cos dous clubs para compartir as nosas lecturas favoritas. Foi unha actividade moi especial na que poidemos coñecer un pouco máis e mellor a outros apaixonados da lectura e tamén para tomar uns petiscos.

 

5 DE XUÑO DÍA DO MEDIO AMBIENTE

Onte celebrouse o día internacional do medio ambiente. Aproveitamos para mostrar novas adquisición da biblioteca relacionadas con esta temática.

 

ENCONTROS INTERCENTROS - De volta !!

 Seguindo coas liñas prioritariais para este curso, fixemos unha xornada de encontros intercentros, co

 CEIP XOSÉ SAN LUÍS ROMERO. 

que nos devolveu a visita despois de acudir nós ao seu centro.

O seu  alumnado de 6º de Primaria  e o noso, elaboraron un podcast onde desenvolveron as súas experiencias radiofónicas e inquedanzas de cara ao futuro próximo no instituto. (Premede nas dúas imaxes seguintes)

Convídámolos a uns petiscos pero o máis sabroso non estivo no prato, senón nas conversas que nos achegan e nos fan medrar xuntos.

Grazas por acompañarnos!

SEMANA DAS LETRAS GALEGAS (II)

 Vencellando a conmemoración das Letras Galegas, ao eido radiofónico, participamos un ano máis no certame "O Vello dos Contos".  

Nas bases do certame, especifícase  a elaboración dun podcast baseado na figura das cantareiras, tan emblemática para nós, preservando e difundido a cultura popular.

Polo tanto, o alumnado de 5º e 6º de primaria, conducindo o rumbo das ondas de Radio Cristinuna, fixo un percorrido biográfico e musical, no que cobraron vida estas fascinantes mulleres, enmarcando o seu contexto coxuntural na sociedade que viviron, o seu olvido e posterior recoñecemento que supuxo o relevo xeneracional e ata unha entrevista con Bieito Romero, fundador de "Luar na Lubre".

Premendo sobre a imaxe, podedes escoitar este podcast digno dun "Premio Marconi"....polo menos!!

Parabéns, rapaces !!

SEMANA DAS LETRAS GALEGAS

 

O noso homenaxe ás cantareiras foi a elaboración dunhas caricaturas desta sete mulleres máis salientables, facendo o que elas mellor sabían: tocar a pandeireta e cantar. Polo tanto, o alumnado de 3º e 4º de primaria, fabricou unhas pandeiretas con material de reciclaxe, e dentro debuxaron a imaxe  de todas elas en forma de caricatura, xunto coas súas coplas máis significativas e coñecidas. Colgámolas decorando os corredores, e este foi o resultado, do que estamos moi fachendosos.

Vivan as nosas letras!!