CONCURSO PODCAST RADIO NA BIBLIO

 Participamos no concurso Radio na Biblio, seguindo a temática proposta: “Mitoloxía clásica na literatura galega contemporánea”, poñendo ademais o foco nas figuras femininas.

Trátase dun traballo internivel no que se combinou a lectura documental, a realización dunha entrevista a un dos autores presentes na nosa bibliografía, Xan Eguía, e, como guinda do pastel, unha lectura dramatizada dun conto clásico.

Un proxecto completo, creativo e cheo de voz propia, no que a literatura cobrou vida a través da palabra.

Para escoitar o podcast, podedes premer na imaxe.

LECTURAS AO SOL

Aproveitando os marabillosos días de sol, a biblioteca tamén decidiu saír "secar".... e aquí temos aos  nenos e nenas alongando os nosos muros da biblio e facendo a aprendizaxe un momento de lecer.

DÍA DA POESÍA (II)

 

Para celebrar o Día da Poesía, os nenos e nenas  de 3º B deixaron voar a imaxinación e crearon fermosos caligramas, onde as palabras non só se len… senón que tamén se miran.

Porque ás veces os poemas non queren quedar quietos nas liñas: queren xogar, tomar forma, converterse en debuxo. E así, entre letras que debuxan e debuxos que falan, nace unha maneira distinta de sentir a poesía.

Porque debuxar un poema é tamén escoitalo cos ollos… e deixalo medrar no corazón.

DÍA DA POESÍA

 

Para festexar o Día da Poesía, os nenos e nenas de 3º B puxéronse mans á obra cunha idea xenial: recitar os poemas tan simpáticos de Mon Padín, Contos da Rata Luísa.

Xa veredes que chulada… e o ben que o pasaron! 

Premede sobre a imaxe e poderedes escoitar o podcast!

BESTIARIO

 Nas seguintes sesións do clube de lectura de "La muy catastrófica visita al zoo" quixemos imaxinar como serían os animais que Josephine e os seus amig@s se atoparían unha vez que realizasen a visita ao zoolóxico. Imaxinamos unha serie de animais fabulosos a partir da técnica das tarxetas: repartimos tarxetas de cartolina nas que estaban escritos nomes de seres aéreos, terrestres, mariños; así como aves, mamíferos, peixes...

Cada participante colliu dúas tarxetas ao azar. Se lles saía, por exemplo, unha ovella e un elefante, inventarían e describirían á "ovellafante".

Estas son algunhas das criaturas inventadas: camestrella (camaleón + estrela de mar), canguleón (canguro + león), calaburón (calamar + tiburón), sardiélago (sardiña + morcego)...

 

 Mesturando as características dos animais que saíron nas tarxetas, os nenos e nenas inventaron unha bestia e describírona, seguindo estas consignas: nome, vertebrado ou invertebrado, características do corpo, lugar onde vive, forma de desprazarse, alimentación e reprodución.

DÍA DA MULLER

Con motivo do Día da Muller elaboramos as nosas recomendacións lectoras por niveis e acompañámolas cun cartel moi significativo. Nel aparece unha muller actual que avanza con decisión cara ao futuro, símbolo da forza, da valentía e levando  auriculares que representan as voces das mulleres  ao longo da historia,  soando e inspirando ás novas xeracións.

UNHA NOVA XORNADA DE BIBLIO CREATIVA

 Coma tódolos venres, seguimos levando a cabo os obradoiros de Biblio Creativa. Nesta última xornada, o alumnado de quinto de primaria amosoulle ao alumnado de cuarto como funciona o MatataLab.

O obxectivo era levar as substancias de refugallo aos contedores correspondentes.